ನವದೆಹಲಿ : ಕೊರೋನಾ ಸಂಕಷ್ಟ ಕಾಲದಲ್ಲೂ ಮೋಸ ಮಾಡಿದ ಮಂದಿಗೆ ಲೆಕ್ಕವಿಲ್ಲ. ಬೆಡ್, ರೆಮ್ಡಿಸೀವರ್, ಆಕ್ಸಿಜನ್ ಎಂದು ಆಸ್ಪತ್ರೆಗಳು ಸೇರಿದಂತೆ ಅನೇಕರು ದುಡ್ಡು ಸುಲಿಗೆ ಮಾಡಿದ್ದೆ ಮಾಡಿದ್ದು.
ಈ ನಡುವೆ ಭಾರತದ ಆಕ್ಸಿಜನ್ ಕೊರತೆಯ ಲಾಭವನ್ನು ಪಡೆದ ಆಫ್ರಿಕಾ ಪ್ರಜೆಗಳಿಬ್ಬರು ಸಿಲಿಂಡರ್ ಒದಗಿಸುವುದಾಗಿ ಹೇಳಿ 2 ಕೋಟಿಗೂ ಹೆಚ್ಚು ಹಣವನ್ನು ಲೂಟಿ ಮಾಡಿರುವುದು ಬೆಳಕಿಗೆ ಬಂದಿದೆ.
ದೆಹಲಿಯ ವ್ಯಕ್ತಿಯೊಬ್ಬರು ಕೊರೋನಾ ಸೋಂಕಿನಿಂದ ಬಳಲುತ್ತಿದ್ದ ತಮ್ಮ ಸಂಬಂಧಿಕರೊಬ್ಬರಿಗಾಗಿ ಆಕ್ಸಿಜನ್ ವ್ಯವಸ್ಥೆಯ ಹುಡುಕಾಟದಲ್ಲಿದ್ದರು. ಈ ವೇಳೆ ಸಾಮಾಜಿಕ ಜಾಲತಾಣದಲ್ಲಿ ಸಿಕ್ಕ ನಂಬರ್ ಗೆ ಕರೆ ಮಾಡಿದರೆ, ಆರೋಪಿಗಳು 16 ಸಾವಿರ ರೂಪಾಯಿ ಪಾವತಿಸುವಂತೆ ಹೇಳಿದ್ದಾರೆ. ಜೊತೆಗೆ 4 ಸಾವಿರ ಸಾರಿಗೆ ಶುಲ್ಕ ನೀಡಲು ಸೂಚಿಸಿದ್ದರು. ಅದರಂತೆ 20 ಸಾವಿರ ಪಾವತಿಸದ ಬಳಿಕ ಮನೆ ಬಾಗಿಲಿಗೆ ಸಿಲಿಂಡರ್ ತಲುಪಲಿದೆ ಎಂದು ಭರವಸೆ ಬೇರೆ ಕೊಟ್ಟಿದ್ದರು. ಆದರೆ ಮನೆಗೆ ಬಾಗಿಲಿಗೆ ಅದ್ಯಾವ ಸಿಲಿಂಡರ್ ಬಂದಿರಲಿಲ್ಲ. ಹೀಗಾಗಿ ಮೋಸ ಹೋದವರು ಮೇ 5 ರಂದು ದೆಹಲಿಗೆ ಪೊಲೀಸರಿಗೆ ದೂರು ಸಲ್ಲಿಸಿದ್ದರು.
ಈ ದೂರಿನಂತೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ಇಬ್ಬರು ಆಫ್ರಿಕನ್ ಪ್ರಜೆಗಳನ್ನು ಬಂಧಿಸಿದ್ದಾರೆ. ಬಂಧಿತರನ್ನು ನೈಜೀರಿಯಾದ ಚೀಮ ಬೆನ್ನೆತ್ (43) ಹಾಗೂ ಘಾನದ ಜೋನಥನ್ ಕೋಜೋ ( 44) ಎಂದು ಗುರುತಿಸಲಾಗಿದೆ.
ಬಂಧಿತರಿಂದ 163 ಸಿಮ್ ಕಾರ್ಡ್, 19 ಫೋನ್, 5 ಲ್ಯಾಪ್ ಟಾಪ್, ನಾಲ್ಕು ಡೆಬಿಟ್ ಕಾರ್ಡ್ ವಶಕ್ಕೆ ಪಡೆಯಲಾಗಿದೆ. ಬೆಂಗಳೂರಿನ ವ್ಯಕ್ತಿಯೊಬ್ಬ ಇವರಿಗೆ ಬ್ಯಾಂಕ್ ಖಾತೆಗಳನ್ನು ತೆರೆದುಕೊಡುತ್ತಿದ್ದ ಎಂದು ಗೊತ್ತಾಗಿದೆ. ಈ ರೀತಿಯ ವಂಚನೆ ಸಲುವಾಗಿಯೇ 20 ಬ್ಯಾಂಕ್ ಖಾತೆಗಳನ್ನು ಸೃಷ್ಟಿಸಿಕೊಂಡಿದ್ದ ಅವರು 2 ಕೋಟಿ ಗೂ ಹೆಚ್ಚು ಹಣವನ್ನು ದೇಶದ ವಿವಿಧ ಭಾಗಗಳಿಂದ ಆಕ್ಸಿಜನ್ ಒದಗಿಸುವುದಾಗಿ ಸುಳ್ಳು ಭರವಸೆ ನೀಡಿ ಸಂಗ್ರಹಿಸಿರುವುದು ಗೊತ್ತಾಗಿದೆ.
Discussion about this post