ಕೊರೋನಾ ಗೆದ್ದ ಮಗುವಿನಲ್ಲಿ ಎ ನೆಕ್ ಕಾಯಿಲೆ : ಮೂರನೇ ಅಲೆಗೂ ಮುನ್ನ ವಕ್ಕರಿಸಿದ ಮತ್ತೊಂದು ಮಾರಿ

ದೇಶದಲ್ಲಿ ಅಪರೂಪ ಅನ್ನುವ ಎ-ನೆಕ್ (Acute nectrotizing encephalopathy of childhood Multisystem inflammatory syndrome in children) ಎಂಬ ಕಾಯಿಲೆ ದಾವಣಗೆರೆಯಲ್ಲಿ ಪತ್ತೆಯಾಗಿದೆ.

ಈ ಹಿಂದೆ ಈ ಕಾಯಿಲೆ ಕೇವಲ ವಯಸ್ಕರಲ್ಲಿ ಮಾತ್ರ ಕಂಡು ಬರುತ್ತದೆ ಎನ್ನಲಾಗಿತ್ತು. ಆದರೆ ಇದೀಗ ಕೊರೋನಾ ಗೆದ್ದ ಮಗುವಿನಲ್ಲಿ ಈ ಸೋಂಕು ಕಂಡು ಬಂದಿರುವುದು ಆತಂಕ ಹುಟ್ಟು ಹಾಕಿದೆ.

ಪ್ರಸ್ತುತ ಮಗುವಿಗೆ ದಾವಣಗೆರೆ ನಗರದ ಎಸ್.ಎಸ್. ವೈದ್ಯಕೀಯ ಸಂಶೋಧನಾ ಸಂಸ್ಥೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಎಸ್.​ಎಸ್.ವೈದ್ಯಕೀಯ ನಿರ್ದೇಶಕ ಡಾ.ನಿಜಲಿಂಗಪ್ಪ ಕಾಳಪ್ಪನವರು ಈ ಬಗ್ಗೆ ಮಾಹಿತಿ ನೀಡಿದ್ದು, ಇಂಥ ಪ್ರಕರಣಗಳಲ್ಲಿ ಶೇ 60ರಷ್ಟು ಸಾವಿನ ಸಾಧ್ಯತೆ ಇದೆ. ಇಂಥ ಒಂದು ವಯಸ್ಕರ ಪ್ರಕರಣ ದೆಹಲಿ ಏಮ್ಸ್​​​ನಲ್ಲಿ ಪತ್ತೆ ಆಗಿತ್ತು. ಆದ್ರೆ ಮಗುವಿನಲ್ಲಿ ಕಂಡು ಬಂದಿರುವುದು ದೇಶದಲ್ಲಿ ಇದೇ ಮೊದಲು ಅಂದಿದ್ದಾರೆ.

ವಿಜಯನಗರ ಜಿಲ್ಲೆಯ ಹೂವಿನ ಹಡಗಲಿ ಮೂಲದ 13 ವರ್ಷದ ಮಗುವಿನಲ್ಲಿ ಇಂತಹ ಲಕ್ಷಣಗಳು ಕಂಡು ಬಂದಿದ್ದು, ಈ ಮಗು ಈಗ ಚೇತರಿಸಿಕೊಳ್ಳುತ್ತಿದೆ. ಇದಕ್ಕೆ ಹಿಮೊನೋಗ್ಲೋಬಿನ್ ಔಷಧಿ ನೀಡಿದರೆ ಚೇತರಿಕೆಯಾಗುತ್ತದೆ. ಆದ್ರೆ ಹಿಮೊನೋಗ್ಲೋಬಿನ್ ಔಷಧಿ ದುಬಾರಿಯಾಗಿದ್ದು, 30ಕೆಜಿ ಮಗುವಿಗೆ ಕನಿಷ್ಠ 75 ಸಾವಿರದಿಂದ ಒಂದು ಲಕ್ಷ ರೂಪಾಯಿ ವೆಚ್ಚವಾಗಲಿದೆ ಎಂದು ವೈದ್ಯರು ಹೇಳಿದ್ದಾರೆ.