ಕಾಂಗೋದಲ್ಲಿ ಪತ್ತೆಯಾಗಿದೆ ಚಿನ್ನದ ಬೆಟ್ಟ –ಗಣಿಗಾರಿಕೆಗೆ ಮುಗಿ ಬಿದ್ದ ಗ್ರಾಮಸ್ಥರು

ಮಧ್ಯ ಆಫ್ರಿಕಾದ ಕಾಂಗೋ ಗಣರಾಜ್ಯದಲ್ಲಿ ಚಿನ್ನವನ್ನೇ ಹೊದ್ದು ಮಲಗಿದಂತಿರುವ ಪರ್ವತವೊಂದು ಪತ್ತೆಯಾಗಿದೆ.

ಕಾಂಗೋದ ದಕ್ಷಿಣ ಕಿವು ಪ್ರಾಂತ್ಯದಲ್ಲಿರುವ ಲುಹಿಹಿ ಅನ್ನುವ ಪರ್ವತದ ಮಣ್ಣಿನಲ್ಲಿ ಶೇ60ರಿಂದ 90ರಷ್ಟು ಚಿನ್ನವಿರುವುದು ಗೊತ್ತಾಗಿದೆ.

ಪರ್ವತ ತುಂಬೆಲ್ಲಾ ಕಲ್ಲು ಮಣ್ಣುಗಳು ತುಂಬಿದ್ದರೂ ಅವೆಲ್ಲವೂ ಚಿನ್ನದಿಂದ ಕೂಡಿದೆ ಅನ್ನೋದು ಗ್ರಾಮಸ್ಥರಿಗೆ ಗೊತ್ತಾಗುತ್ತಿದ್ದಂತೆ ಗ್ರಾಮಸ್ಥರು ಸಿಕ್ಕಷ್ಟು ಸಿಗಲಿ ಎಂದು ಗಣಿಗಾರಿಕೆಯಲ್ಲಿ ತೊಡಗಿದ್ದಾರೆ.

ಕೇವಲ ಅಕ್ಕ ಪಕ್ಕದ ಗ್ರಾಮಸ್ಥರು ಮಾತ್ರವಲ್ಲದೆ ದೂರದೂರಿನ ನಾಗರಿಕರು ಕೂಡಾ ಚಿನ್ನದ ಬೆಟ್ಟಕ್ಕೆ ಲಗ್ಗೆ ಇಟ್ಟಿದ್ದಾರೆ.

ಬೆಟ್ಟದಲ್ಲಿ ಗುಂಡಿಗಳನ್ನು ತೋಡಿ ಮಣ್ಣು ಬಗೆದು ಮನೆಗೆ ತೆಗೆದುಕೊಂಡು ಹೋಗುತ್ತಿದ್ದಾರೆ. ಪತ್ರಕರ್ತರೊಬ್ಬರು ಹಂಚಿಕೊಂಡಿರುವ ವಿಡಿಯೋ ನೋಡಿದರೆ ಅದ್ಯಾವುದೋ ಜಾತ್ರೆಯ ಸಂಭ್ರಮದಂತೆ ಗೋಚರಿಸುತ್ತಿದೆ.

ಈ ನಡುವೆ ಚಿನ್ನದ ನಿಕ್ಷೇಪಕ್ಕಾಗಿ ಜನ ಮುಗಿ ಬೀಳುತ್ತಿರುವುದನ್ನು ಗಮನಿಸಿದ ಸ್ಥಳೀಯ ಆಡಳಿತ ಇದೀಗ ಗಣಿಗಾರಿಕೆಗೆ ತಡೆ ನೀಡಿದೆ.

ಚಿನ್ನದ ಬೆಟ್ಟಕ್ಕೆ ಯಾವುದೇ ನಾಗರಿಕರು ಭೇಟಿ ನೀಡಬಾರದು ಎಂದು ಆದೇಶಿಸಲಾಗಿತ್ತು ಭದ್ರತೆಯನ್ನು ಹೆಚ್ಚಿಸಲಾಗಿದೆ.