ಮನುಷ್ಯ ಮತ್ತು ನಾಯಿಯ ಸಂಬಂಧವನ್ನು ವಿವರಿಸುವ ಸಿನಿಮಾಗಳು ಸಾಕಷ್ಟು ಬಂದಿವೆ. ಬೇರೆ ಬೇರೆ ಭಾಷೆಗಳಲ್ಲಿ ಇಂತಹ ಕಥೆ ಹೊತ್ತು ಬಂದ ಸಿನಿಮಾಗಳಿಗೆ ಲೆಕ್ಕವಿಲ್ಲ.
ಇದೀಗ ಅಂತಹುದೇ ಬಾಂಧವ್ಯದ ಕಥೆಯನ್ನು ಹೊತ್ತು ತಂದಿರುವ ಸಿನಿಮಾ ನಾನು ಮತ್ತು ಗುಂಡ. ಆದರೆ ಈವರೆಗೆ ಬಂದಿರುವ ಮನುಷ್ಯ ಮತ್ತು ನಾಯಿಯ ನಡುವಿನ ಸಿನಿಮಾಗಳ ಸಾಲಿನಲ್ಲಿ ಭಿನ್ನವಾಗಿ ನಿಲ್ಲುವ ಚಿತ್ರ ನಾನು ಮತ್ತು ಗುಂಡ.
ಸಿನಿಮಾ ನೋಡಿ ಹೊರಗೆ ಬಂದವರ ಕಣ್ಣಂಚಿನಲ್ಲಿ ಕಣ್ಣೀರು ಇಡೀ ಚಿತ್ರದ ಕಥೆಯನ್ನು ಸಾರುತ್ತಿತ್ತು. ಕೆಲವರಂತು ಮನೆಯಲ್ಲಿ ಗುಂಡನಿದ್ರೆ ಸಿನಿಮಾ ನೋಡಿ ಅಂದಿದ್ದಾರೆ. ಮತ್ತೆ ಕೆಲವರು ಕೋಟಿ ಕೋಟಿ ಸುರಿದು ಮಾಡಿದ 10 ಸಿನಿಮಾ ನೋಡುವ ಬದಲು ಇದೊಂದು ಸಿನಿಮಾ ನೋಡಿದರೆ ಸಾಕು ಅಂದಿದ್ದಾರೆ.
ಇನ್ನು ಸಿನಿಮಾದ ಕಥೆ ಬಗ್ಗೆ ಹೇಳುವುದಾದರೆ ಲವ್ ಮ್ಯಾರೇಜ್ ಆಗಿ ಮಕ್ಕಳಾಗದ ನೋವಿನಲ್ಲಿರುವ ಆಟೋ ಡ್ರೈವರ್ ಶಂಕ್ರ. ಈತನ ಲೈಫಿನಲ್ಲೊಂದು ಆಚಾನಕ್ ತಿರುವು. ಮಕ್ಕಳಾಗದ ನೋವಿನಲ್ಲಿ ರಾತ್ರಿ ಕುಡಿದ ಮತ್ತಿನಲ್ಲಿರುವಾಗ ಆತನ ಬಳಿ ಬರೋ ಅಪರೂಪದ ಅತಿಥಿ ಗುಂಡ. ಶಂಕ್ರ ಅತಿಥ್ಯದ ಕರಗಿ ನಿಯತ್ತು ತೋರಿಸುವ ಗುಂಡ. ಈ ನಿಯತ್ತಿನ ಬಾಂಧವ್ಯದಿಂದ ಶಂಕ್ರನ ಮನೆಯಲ್ಲಿ ಬಿರುಗಾಳಿ, ಮನುಷ್ಯ ಪ್ರೀತಿಗಿಂತ ಶ್ವಾನ ಪ್ರೀತಿಯೇ ಶ್ರೇಷ್ಠ ಅನ್ನೋ ಸಾಲು ಇದು ನಾನು ಮತ್ತು ಗುಂಡ ಚಿತ್ರದ ಓನ್ ಲೈನ್ ಸ್ಟೋರಿ.
ನಾಯಿಯನ್ನ ಸಾಕಿ ಅದರ ಪ್ರೀತಿ ಪಡೆದವರಿಗೆ, ನಾಯಿಯ ನಿಯತ್ತು, ಪ್ರೀತಿ ಗೊತ್ತಿರೋರಿಗೆ ಈ ಚಿತ್ರ ಮನಸ್ಸಿಗೆ ತಟ್ಟೋದು ಗ್ಯಾರಂಟಿ. ಕಥೆ ನಗುವಿನಿಂದ ಶುರುವಾದರು, ಹೊತ್ತು ಕಳೆದಂತೆ ಬರೋ ತಿರುವುಗಳು ಪ್ರೇಕ್ಷಕನನ್ನು ಭಾವುಕಥೆಗೆ ತಳ್ಳುತ್ತದೆ.
ಚಿತ್ರದ ಮುಖ್ಯ ಹೈಲೈಟ್ ಅಂದ್ರೆ ಕಥೆ ಮತ್ತು ಶಿವರಾಜ್ ಕೆ.ಆರ್ ಪೇಟೆ ಹಾಗೂ ಸಿಂಬಾ ( ಗುಂಡ)ನ ಅದ್ಭುತ ಪರ್ಫಾರ್ಮೆನ್ಸ್. ಶಿವರಾಜ್ ಕೆ.ಆರ್ ಪೇಟೆ ಮತ್ತು ಸಿಂಬಾ ನಡುವಿನ ಬಾಂಡಿಂಗ್ ಅದ್ಭುತ ಅನ್ನಿಸುತ್ತೆ. ಮಾಧ್ಯಮ ಲೋಕದಿಂದ ಹಾಸ್ಯ ಕಲಾವಿದನಾಗಿ ಉದಯಿಸಿದ ಕೆ ಆರ್ ಪೇಟೆ ಈ ಚಿತ್ರದ ಮೂಲಕ ತಾನೊಬ್ಬ ಹಾಸ್ಯನಟ ಮಾತ್ರವಲ್ಲ ಅನ್ನುವುದನ್ನು ಸಾರಿದ್ದಾರೆ.
ಅಂದ ಹಾಗೇ ಇದು ನೈಜ ಘಟನೆಯನ್ನಾಧರಿಸಿ ಮಾಡಿರೋ ಸಿನಿಮಾ.
Discussion about this post